«Барселона» президенти Жоан Лапорта Испания Кубоги ярим финалининг жавоб учрашуви олдидан ўз фикрлари билан ўртоқлашди.

Эслатиб ўтамиз, каталонияликлар Мадриддаги илк ўйинда 0:4 ҳисобида имкониятни бой бериб, мухлисларини ранжитишган эди. Энди сешанба куни, 3 март санасида Ханс-Дитер Флик шогирдлари «Камп Ноу»да «матрасчилар»ни қабул қилишади.

«Сўнгги учта финалда биз «Реал Мадрид»га ҳақиқий футбол дарсини ўтиб қўйгандик. Энди эса ўз уйимиздаги жавоб ўйинида «Атлетико» билан қарама-қаршилик тақдирини ўз фойдамизга ўзгартира оламиз», — дея Лапортанинг сўзларини келтиради «Managing Barca» нашри.

Учрашув Тошкент вақти билан чоршанбага ўтар кечаси соат 01:00да бошланади. Унгача эса, яъни бугун шанба куни, «кўк-анорранглилар» Ла Лига доирасида ўз майдонларида «Вильярреал»га қарши муҳим баҳсда майдонга тушишади.