Англия чемпионатининг 28-турида «Астон Вилла» сафарда кутилмаганда «Вулверхэмптон»га имкониятни бой берди. Учрашув 0:2 ҳисобида мезбонлар фойдасига ҳал бўлди.

«OptaJoe» тақдим этган маълумотларга кўра, Унаи Эмери бошқаруви остида «Астон Вилла» Премьер-лига доирасида хавфли ҳудудда бораётган жамоаларга қарши ўтказилган 26 та ўйинда бор-йўғи иккинчи бор мағлубиятга учради. «Шерлар» ушбу баҳсларнинг 18 тасида ғалаба қозониб, 6 бор дуранг ўйнашган эди. Қизиғи шундаки, ҳар иккала мағлубият ҳам бир хил — 0:2 ҳисобида қайд этилган.

Ҳозирда «Астон Вилла» АПЛ турнир жадвалида 51 очко билан учинчи ўринни эгаллаб турибди. 29-турда бирмингемликлар ўз майдонида Лондоннинг «Челси» клубини қабул қилишади. Ушбу баҳс 4 март кунига белгиланган.