U-17 ўсмирлар терма жамоаси ўзининг навбатдаги йиғинини ўтказиш учун 16 август, жума куни Тошкентга етиб келди.

Дилшод Нуралиев бош мураббийлигидаги Ўзбекистон U-17 ўсмирлар терма жамоаси 17-23 август кунлари Тошкентда навбатдаги ўқув-машғулот йиғинини ўтказиши ҳақида маълумот берган эдик. Нуралиев шогирдлари ушбу йиғин давомида Эрон ўсмирлар терма жамоасига қарши 3та ўртоқлик-назорат ўйинини ўтказади. Ўзбекистон ҳамда Эрон ўсмирлари ўртасидаги ўйинлар 18, 20, 22 август кунлари Тошкентдаги «Жар» стадионида бўлиб ўтади.

Тошкентда Эрон ўсмирлар терма жамоасига қарши бўлиб ўтадиган учрашувлар, Нуралиев шогирдлари учун шу йилнинг 17 октябрь - 8 ноябрь кунлари БАА мамлакатида бўлиб ўтадиган U-17 ўсмирлар ўртасидаги жаҳон чемпионати финал босқичи ўйинлари олдидан тайёргарлик вазифасини ўтайди.

Маълумот ўрнида, ўсмирлар ўртасидаги жаҳон чемпионати баҳслари финал босқичига қуръа ташлаш маросими 26 август куни Абу-Даби шаҳрида бўлиб ўтади. Қуръа ташлаш маросимида Ўзбекистон ўсмирлар терма жамоаси бош мураббийи Дилшод Нуралиев ҳамда терма жамоа сардори Отабек Шукуров иштирок этадилар.