“Локомотив” – “Гулистон” (6:2) ўйинидан кейинги матбуот анжуманининг иккинчи қисмида Ҳаким Фузайлов иштирок этди.

— Бугун таркибда бир қанча ротацияни амалга оширишга тўғри келди. Бир гуруҳ футболчилар куни кеча терма жамоа сафидан қайтишди. Улар 14 август куни икки томонлама ўйинда ҳаракат қилишди. Боз устига, олдимизда Ўзбекистон кубогининг ярим финал жавоб баҳси турибди. Шунинг учун бугунги ўйинда уларга дам бердим. Шунинг учун учрашув бошида ўйинимиз яхши чиқмади. Шунга қарамай йигитларнинг маҳорати юқори ва шунинг эвазига ғалаба қозондик.

— Биринчи бўлимда “Гулистон” яхши ўйнади. Иккинчи бўлимда рақибнинг кучсиз ўйнашини кутганмидингиз?
— Бахтиёр Ашурматов қисқа захира ўриндиғига эга. Унга осон эмас. Бугун ҳаво иссиқ бўлди, рақиб футболчилари тўпсиз ҳаракат қилиб, чарчаб қолишди. Шунинг учун иккинчи бўлимда мана шундай йирик кўринишга келди.

— “Дерби”да Фарҳод Тожиев иштирок эта оладими?
— Фарҳод Тожиев дербида қатнашмаслиги аниқ. Боиси, у энди индивидуал равишда шуғулланишни бошлади, ҳали умумий гуруҳга қўшилмади. У 10 кунлардан кейин умумий гуруҳда шуғуллана бошлайди. Терма жамоанинг ЖЧ-2014 саралаш ўйинлари туфайли юзага келган қисқа танаффусда у ўз формасини тиклаб олади деган умиддаман.

— Бугун “Локомотив”да илк марта ўйнаган Илҳом Суюнов ҳақида фикрингиз?
— Илҳомга гап йўқ. У ёзги танаффуснинг сўнгги кунларида сафимизга қўшилган бўлса-да, ортиқча вазндан қутилди. У машғулотларда яхши ишламоқди. Биринчи марта ўйинга тушгани учун унга бугун осон бўлмади. Илҳом шундай ишлашда давом этса, асосий таркибнинг муқим футболчисига айланади.