Германия терма жамоаси бош мураббийи Юлиан Нагельсманн «Бавария»нинг ҳужумкор ярим ҳимоячиси Леннарт Карл ҳақида ўз фикрларини билдирди.

18 ёшли футболчи ҳали Германиянинг асосий терма жамоасида дебют қилмаган бўлса-да, клубдаги муваффақиятли ўйинлари фонида номзодлардан бири сифатида кўрилмоқда.

«Леннарт ҳайратланарли даврни ўтказди. Ҳозир унда бироз қийинчиликлар бор — бу қисман Мусиаланинг сафга қайтгани билан боғлиқ. Шунга қарамай, у жуда қизиқарли футболчи эканлиги кўриниб турибди: у рақибни ажойиб тарзда алдаб ўтади, қанотдан марказга сурилиб, чап оёқда зарба беради, уни назорат қилиш жуда қийин. Аммо мен у ЖЧ-2026 га бориши учунгина «Бавария» асосий таркибида доимий майдонга тушишини кутмаяпман. Ҳозир у ўз ритмини топиши ва ўзига бўлган ишончни тиклаши керак. Унда ўша ёшлик энергияси ва жасорат бўлиши лозим, акс ҳолда мен шунчаки ўз ўйинини барқарор кўрсата оладиган тажрибали футболчини таклиф қилишим мумкин», — деди Нагельсманн.

Леннарт Карл жорий мавсумдаги 30 та ўйинда 7 та гол ва 4 та голли узатмага муаллифлик қилди.