«Ювентус» вингери Франсишку Консейсау А Сериянинг «Рома»га қарши кечган ва жанговар дуранг (3:3) билан якунланган ўйинидан сўнг интервью берди.
Туринликлар 1:3 ҳисобида мағлуб бўлаётиб, баҳс якунида Жереми Бога ва Федерико Гаттининг мос равишда 78 ва 93-дақиқалардаги аниқ зарбалари эвазига мағлубиятдан қутулиб қолишди. Консейсау эса 47-дақиқада меҳмонларнинг илк голига муаллифлик қилган эди.
«Агар бу оқшом ғалабага лойиқ жамоа бўлган бўлса, бу биз эдик. Мен чиройли гол уришга муваффақ бўлдим, лекин мени голимдан кўра кўпроқ 1:3 ҳисобида мағлуб бўла туриб, шундай қийин вазиятдан чиқиб кетганимиз қувонтиради. Биз ажойиб ишни амалга оширдик ва ҳаққоний равишда мағлубиятдан қоча олдик», — дея журналист Николо Скира Консейсаунинг сўзларини келтирмоқда.
Ҳозирда «Ювентус» 47 очко билан турнир жадвалида олтинчи ўринни эгаллаб турибди, «Рома» эса 51 очко билан тўртинчи поғонада бормоқда.
