"Манчестер Сити" бош мураббийи Хосеп Гвардиола жамоасининг "етарлича ишончли бўлмаган" ғалабалари ҳақидаги саволга киноя билан жавоб қайтарди.
"Шаҳарликлар" "Арсенал"ни қувишда давом этмоқдалар, бироқ охирги икки ўйинда ғалаба осонлик билан қўлга киритилмади: "Ньюкасл" 2:1 ҳисобида мағлуб этилган бўлса, "Лидс" билан бўлган учрашув тақдирини битта гол ҳал қилди.
"Мен футболчилардан ["Лидс"га қарши ўйинда] бешта гол уришни сўрагандим, лекин улар мени эшитишмади... Агар сизга бу жуда осон бўлиб туюлса, демак адашасиз. Биз яхши ўйнадик ва ҳамма нарсани назорат қилдик", — дея Гвардиоланинг сўзларини City Xtra нашри келтирмоқда.
"Манчестер Сити" чоршанба куни Премьер-лиганинг 29-тури доирасида ўз майдонида "Ноттингем Форест"ни қабул қилади.
