"Ювентус" вингери Франсишку Консейсау "Рома"га қарши кечган баҳсда (3:3) ўз номини таблога ёздириб қўйишга муваффақ бўлди.
23 ёшли футболчи учрашувнинг 47-дақиқасида рақиб дарвозасини ишғол қилиб, ҳисобни 1:1 кўринишига келтирди. Кейинчалик римликлар 3:1 ҳисобида олдинга чиқиб олишди, бироқ меҳмонлар Жереми Бога ва Федерико Гаттининг ҳаракатлари эвазига барибир мувозанатни тиклашди.
Opta хабар беришича, Консейсау А Сериянинг битта мавсуми доирасидаги иккала ўйинда ҳам "Рома" дарвозасига гол урган иккинчи португалиялик футболчига айланди. Бу борада биринчи натижа "Ювентус"нинг собиқ юлдузи Криштиану Роналдуга тегишли эди. Афсонавий ҳужумчи 2018 йилдан 2021 йилгача "кекса синьора" шарафини ҳимоя қилган.
Франсишку Консейсау жорий мавсумда Италия чемпионатида учта гол урди. Улардан иккитаси айнан "Рома" дарвозасига киритилган.
