"Барселона" ярим ҳимоячиси Гави тиззасидаги жарроҳлик амалиётидан сўнг тикланиш жараёнини якунламоқда. 21 ёшли футболчи ўтган йилнинг август ойидан бери майдонда кўриниш бермаётган эди, бироқ тез орада у яна "кўк-анорранглилар" таркибига қайтади.
Mundo Deportivo нашрининг хабар беришича, бош мураббий Ханс-Дитер Флик ярим ҳимоячини Ла Лиганинг 7 март куни бўлиб ўтадиган "Атлетик" Бильбаога қарши навбатдаги ўйини қайдномасига киритади. Бунга қадар эса Каталония гранди Испания Кубоги ярим финали доирасида Мадриднинг "Атлетико" жамоасига қарши жавоб учрашувини (3 март) ўтказиши керак.
Айни дамда "Барселона" Испания чемпионати турнир жадвалида пешқадамлик қилмоқда ва Мадриднинг "Реал" клубини тўрт очкога ортда қолдирмоқда.
