"Barselona" yarim himoyachisi Gavi tizzasidagi jarrohlik amaliyotidan so‘ng tiklanish jarayonini yakunlamoqda. 21 yoshli futbolchi o‘tgan yilning avgust oyidan beri maydonda ko‘rinish bermayotgan edi, biroq tez orada u yana "ko‘k-anorranglilar" tarkibiga qaytadi.

Mundo Deportivo nashrining xabar berishicha, bosh murabbiy Xans-Diter Flik yarim himoyachini La Liganing 7 mart kuni bo‘lib o‘tadigan "Atletik" Bilbaoga qarshi navbatdagi o‘yini qaydnomasiga kiritadi. Bunga qadar esa Kataloniya grandi Ispaniya Kubogi yarim finali doirasida Madridning "Atletiko" jamoasiga qarshi javob uchrashuvini (3 mart) o‘tkazishi kerak.

Ayni damda "Barselona" Ispaniya chempionati turnir jadvalida peshqadamlik qilmoqda va Madridning "Real" klubini to‘rt ochkoga ortda qoldirmoqda.