Fichajes нашри хабарига кўра, "Барселона" клуби яқинлашиб келаётган ёзги трансфер ойнасида жамоасини ўзгартириши мумкин бўлган "Манчестер Сити" ярим ҳимоячиси Родри учун курашда Мадриднинг "Реал" клубига нисбатан устунликка эга бўлди.
Испаниялик футболчининг инглиз клуби билан шартномаси 2027 йилнинг июнига қадар амал қилишига қарамай, унинг атрофидаги вазият мавҳумлигича қолмоқда. Бу эса Испания футболининг икки гранди — "Барселона" ва "Реал Мадрид" эътиборини тортди.
Манбанинг маълумотига кўра, ҳозирги вақтда Каталония клуби музокараларда анча қулай позицияда турибди. "Барселона" раҳбарияти "Олтин тўп" соҳибини майдон марказининг потенциал етакчиси сифатида кўрмоқда ва уни ёзги трансферлар учун асосий мақсад деб ҳисоблайди. Шунингдек, футболчининг ўзи ҳам Ла Лигага айнан Каталония жамоаси таркибида қайтишга мойиллик билдираётгани қайд этилган.
"Манчестер Сити"нинг позицияси кўп жиҳатдан шартномани узайтириш истиқболларига боғлиқ. Агар янги келишувга эришилмаса, клуб келажакда футболчини текинга қўйиб юбормаслик учун уни сотиш вариантини кўриб чиқиши мумкин. Эҳтимолий трансфер суммаси тахминан 50 миллион еврога баҳоланмоқда.
