«Комо» клубининг 21 ёшли аргентиналик ярим ҳимоячиси Николас Пас Мадриднинг «Реал» клубига қайтиши мумкинлиги борасида иккиланмоқда. Бу ҳақдаги маълумотни Италиянинг Tuttosport газетаси чоп этди.

Бундан аввал «Реал» жорий мавсум якунланганидан сўнг ўз тарбияланувчисини қайтаришни режалаштираётгани ҳақида бир неча бор хабар берилган эди.

Бироқ, манбанинг маълумотларига кўра, Пас «Реал»га фақатгина етарли ўйин вақти кафолатлансагина қайтишга тайёр. Ёш футболчи жамоада муҳим рол ўйнашни истамоқда.

Таъкидланишича, ушбу вазиятдан Миланнинг «Интер» клуби фойдаланиб қолиши мумкин. «Неррадзуррилар» Пасни мунтазам ўйин амалиёти билан таъминлашга тайёр.

Ушбу мавсумда ярим ҳимоячи барча турнирларда 29 та учрашувда иштирок этиб, ўнта гол урди ва олтита голли узатмага муаллифлик қилди.