«Манчестер Юнайтед» ҳимоячиси Диогу Далот жамоа ҳужумчиси Беньямин Шешко билан бўлган дўстлиги ҳақида сўзлаб берди.

«Бен ўз турмуш тарзига кўра худди мен каби «вақтли уйғонувчи», шу сабабли биз Каррингтондаги машғулот базасига бошқалардан кўра эртароқ етиб келамиз. Илк бир неча ҳафта ичидаёқ биз дўстлашиб олдик.

Бизнинг хулқ-атворимиз ва фикрлаш тарзимиз ўхшаш, шунинг учун дўстлигимиз ўз-ўзидан шаклланди. Баъзида бу янги муҳитга, янги лига ва мамлакатга мослашишда ёрдам беради.

Бен жуда камтар йигит, у доимо яхшироқ бўлишга ҳаракат қилади. У таркибда жуда муҳим позицияни эгаллаб, катта умидлар билан катта клубга келди. Менимча, Бен тўғри йўлда. Афсуски ёки бахтимизга, ҳужумчилар голларга жуда боғлиқ бўлишади. Ҳозир унинг ўйини яхши кетмоқда, биз ундан жуда мамнунмиз», — дея Далотнинг сўзларидан иқтибос келтиради BBC.