Лондоннинг "Арсенал" клуби бош мураббийи Микель Артета жароҳат олган футболчилари, хусусан, Деклан Райс ва Кай Хаверцнинг ҳолати ҳақида гапириб берди.
"У [Хаверц] машғулотларнинг бир қисмида иштирок этди. Шу боис биз кутишимиз ва унинг ўйинга тайёрлиги ҳамда қандай спорт формасида эканлигини кўришимиз керак бўлади. Умид қиламанки, Деклан майдонга туша олади. Бугун у ўзини анча яхши ҳис қилди", — дея Артетанинг сўзларидан иқтибос келтирмоқда "Арсенал" расмий сайти.
Шунингдек, мураббий "Брайтон"га қарши ўйинда Бен Уайт ёрдам бера олмаслигини, бироқ жамоа сардори Мартин Эдегорда майдонга тушиш имконияти борлигини қўшимча қилди.
Эслатиб ўтамиз, ўтган якшанба куни Хаверц "Челси"га қарши кечган уй учрашувининг (2:1) сўнгги дақиқаларида майдонга тушган эди, Райс эса иккинчи бўлимда Кристиан Нёргорга алмаштирилганди.
