Германия ОАВларида миллий терма жамоа ҳимоячиси Антонио Рюдигернинг хатти-ҳаракатлари юзасидан қизғин муҳокамалар бошланди. Ла Лига доирасидаги "Реал Мадрид" ва "Хетафе" ўртасидаги ўйинда Рюдигер "Хетафе" ҳимоячиси Диего Риконинг юзига тиззаси билан зарба берди ва жазосиз қолди.

Бир қатор нашрлар футболчини кескин танқид остига олди. Bild порталидаги мақолада бу шунчаки қўпол фол эмас, балки амалдаги "ҳужум" эканлиги ёзилди. Эълон қилинган матнларнинг асосий мазмуни шундан иборатки, ўз хулқ-атворини назорат қила олмайдиган ва буни биринчи марта такрорламаётган футболчи жаҳон чемпионатига бормаслиги керак.

Бундан олдин Германия терма жамоаси бош мураббийи Юлиан Нагельсманн жамоада "дахлсиз" футболчилар йўқлигини ҳамда спортнинг асосий тамойилларини бузувчи ҳолатларга йўл қўйиб бўлмаслигини таъкидлаган эди.