Germaniya OAVlarida milliy terma jamoa himoyachisi Antonio Ryudigerning xatti-harakatlari yuzasidan qizg‘in muhokamalar boshlandi. La Liga doirasidagi "Real Madrid" va "Xetafe" o‘rtasidagi o‘yinda Ryudiger "Xetafe" himoyachisi Diyego Rikoning yuziga tizzasi bilan zarba berdi va jazosiz qoldi.

Bir qator nashrlar futbolchini keskin tanqid ostiga oldi. Bild portalidagi maqolada bu shunchaki qo‘pol fol emas, balki amaldagi "hujum" ekanligi yozildi. E’lon qilingan matnlarning asosiy mazmuni shundan iboratki, o‘z xulq-atvorini nazorat qila olmaydigan va buni birinchi marta takrorlamayotgan futbolchi jahon chempionatiga bormasligi kerak.

Bundan oldin Germaniya terma jamoasi bosh murabbiyi Yulian Nagelsmann jamoada "daxlsiz" futbolchilar yo‘qligini hamda sportning asosiy tamoyillarini buzuvchi holatlarga yo‘l qo‘yib bo‘lmasligini ta’kidlagan edi.