"Тоттенхэм"нинг собиқ ярим ҳимоячиси Деле Алли бугун, 4 март куни "шпорлар" базасида машғулот ўтказди.
Инсайдер Фабрицио Романонинг маълумотларига кўра, 29 ёшли футболчи янги жамоа қидираётган бир вақтда Лондон клуби базасида формасини тикламоқда. Ўйинчи ўз футболчилик фаолиятида янги саҳифа очишни истайди ва "Тоттенхэм" унга клуб майдонида машғулот ўтказишга рухсат берган.
Деле Аллининг фаолиятидаги сўнгги клуб "Комо" бўлган эди. У Италия жамоасини 2025 йилнинг сентябрь ойида эркин агент сифатида тарк этган. Ярим ҳимоячи "Тоттенхэм" шарафини 2015 йилдан 2022 йилгача ҳимоя қилган. Умумий ҳисобда Алли Лондон клуби сафида барча турнирларда 269 та ўйин ўтказиб, 67 та гол урган ва 59 та голли узатмани амалга оширган.
