Антуан Гризманн МЛСга ўтиш борасидаги масалани кейинга қолдирди.
Аввалроқ "Атлетико" ҳужумчиси "Орландо Сити" клубига ўтишга яқин экани маълум бўлган эди.
ESPN берган маълумотларга кўра, француз футболчиси Мадрид жамоаси Испания Кубоги финалига чиққанидан сўнг трансфер бўйича музокараларни тўхтатиб қўйган. Америка клуби футболчини трансфер ойнаси ёпилгунига қадар, яъни 26 мартгача ўз сафига қўшиб олмоқчи эди.
Манбалардан бирининг таъкидлашича, ушбу таклиф фақат жорий трансфер ойнаси учун амал қилади, чунки кейинчалик "Орландо"да бошқа номзодлар пайдо бўлиши мумкин.
Қайд этилишича, "Атлетико" бош мураббийи Диего Симеоне ва клуб раҳбарияти Гризманннинг мавсум охиригача қолишини исташмоқда — улар футболчини соврин билан кузатиб қўйишни мақсад қилишган.
