Лондоннинг «Арсенал» клуби дарвозабони Давид Райя Премьер-лигадаги дастлабки 100 та ўйинида дарвозаси дахлсизлигини сақлаб қолиш бўйича «МЮ» собиқ посбони Эдвин ван дер Сарнинг натижасини такрорлади. Ван дер Сар ўз вақтида «қизил иблислар» сафидаги дастлабки юзта ўйинининг 43 тасида гол ўтказиб юбормаган эди. Райяда ҳам худди шундай кўрсаткич қайд этилди.
Рейтинг пешқадами — Петр Чех бўлиб қолмоқда. «Челси»нинг собиқ аъзоси дастлабки юзта баҳснинг 59 тасида «қуруқ» ўйин ўтказган. Иккинчи ўринни Пепе Рейна («Ливерпуль», 54), учинчи ўринни эса Эдерсон Мораес (46) эгаллаб турибди. Тўртинчи поғонани Петер Шмейхель ва Алиссон Бекер (ҳар иккисида 44 тадан) бўлишиб олишган.
Давид Райя АПЛдаги юзинчи ўйинини шу чоршанба куни «Брайтон»га қарши ўтказди. Унда «тўпчилар» кичик 1:0 ҳисобида ғалаба қозонишди.
АПЛ тарихида дастлабки 100 ўйинда энг кўп «қуруқ» ўйин ўтказган дарвозабонлар:
| Ўрин | Дарвозабон | Клуб | «Қуруқ» ўйинлар сони |
| 1 | Петр Чех | «Челси» | 59 |
| 2 | Пепе Рейна | «Ливерпуль» | 54 |
| 3 | Эдерсон | «Манчестер Сити» | 46 |
| 4 | Петер Шмейхель | «МЮ» | 44 |
| 5 | Алиссон Бекер | «Ливерпуль» | 44 |
| 6 | Эдвин ван дер Сар | «МЮ» | 43 |
| 7 | Давид Райя | «Арсенал» | 43 |
