Марокаш Қироллик футбол федерацияси Валид Реграги миллий терма жамоа бош мураббийи лавозимини тарк этганини эълон қилди.
Ташкилот ўзининг расмий YouTube-каналидаги жонли эфир давомида мутахассиснинг кетганини ва унинг ўрнига Моҳамед Уаби тайинланганини маълум қилди.
«Жамоага янги мураббий билан бирга янги қиёфа, ўзгача энергия ва янгича қараш керак. Ўйлайманки, ЖЧ-2026 олдидан жамоа ривожланишда давом этиши учун унга янги ҳаёт ва янги тасаввур зарур. Менинг кетиш ҳақидаги қарорим ушбу жамоа эволюциясининг бир қисмидир», — деди Реграги.
Эслатиб ўтамиз, январь ойида Марокаш терма жамоаси Африка Кубоги финалида Сенегалга имкониятни бой берган эди (0:1, қўшимча вақтларда).
50 ёшли марокашлик мутахассис 2022 йилнинг августидан бери жамоани бошқариб келаётган эди. Унинг қўл остида марокашликлар 49 та ўйин ўтказиб, 36 та ғалаба, 8 та дуранг ва 5 та мағлубият қайд этишди.
