«Ботафого» клубидан истеъфога чиқарилганидан бир ой ўтиб, Давиде Анчелотти яна отасининг ихтиёрига қайтмоқда. Энди у Карло Анчелоттига Бразилия миллий терма жамоасини жаҳон чемпионатига тайёрлашда кўмаклашади. Ҳозирча бразилияликлар март ойида иккита ўртоқлик учрашуви ўтказишади — Франция ва Хорватия терма жамоаларига қарши. Давиде Карло Анчелотти штабида айнан қандай лавозимни эгаллашига derbyderbyderby.it нашри аниқлик киритмаган.

Эслатиб ўтамиз, жаҳон чемпионати 11 июнь куни бошланади ва бир йўла учта йирик давлат — Америка Қўшма Штатлари, Канада ҳамда Мексикада бўлиб ўтади. Бразилия терма жамоаси беш карра жаҳон чемпиони ҳисобланади, бироқ улар охирги марта анча аввал — 2002 йилда ушбу унвонни қўлга киритишган.