"Барселона" ҳужумчиси Роберт Левандовски Харри Кейннинг "Бавария"даги муваффақиятлари ҳақида ўз фикрлари билан ўртоқлашди.

Англиялик форвард Бундеслиганинг жорий мавсумида 24 турдан сўнг 30 та гол уришга муваффақ бўлди. Маҳсулдорлик бўйича рекорд ҳали ҳам польяк футболчисига тегишли бўлиб, у 2020/21 йилги мавсумда мюнхенликлар сафида 41 та гол киритган эди.

"Кейн жуда кўп гол урмоқда, чин маънода ажойиб ўйнаяпти ва ўз ишини аъло даражада бажармоқда. Яқинда мен бу рекордни атиги 29 та ўйинда янгилаганимни кўриб қолдим. Агар ўша мавсумда барча 34 та ўйинда иштирок этганимда, қанча гол уришим мумкинлигини тасаввур қиляпман. Харри менга бу ютуғим билан янада кўпроқ фахрланиш учун сабаб бермоқда", – деди "кўк-анорранглилар"нинг 37 ёшли футболчиси Sky Sport телеканалига берган интервьюсида.

Роберт Левандовски 2022 йилда "Бавария"ни "Барселона"га алмаштирган эди.