«Бавария» бош мураббийи Венсан Компани Бундеслига доирасида «Боруссия Мёнхенгладбах»га қарши кечган ўйиннинг танаффусида дарвозабон Мануэль Нойерни алмаштиришга мажбур бўлди.

39 ёшли сардор биринчи бўлимда ўз дарвозаси дахлсизлигини сақлаб қолди, бироқ иккинчи бўлимда майдонга тушмади — унинг ўрнини Йонас Урбиг эгаллади. Шунга қарамай, «Sky Sport» берган маълумотларга кўра, фахрий посбоннинг жароҳати унчалик жиддий эмас — алмаштириш шунчаки эҳтиёт чораси сифатида амалга оширилган.

Танаффусга қадар «Бавария» Луис Диас ва Конрад Лаймернинг голлари эвазига 2:0 ҳисобида олдинда бораётган эди. Иккинчи бўлим бошида эса Жамал Мусиала пенальтини аниқ амалга ошириб, мюнхенликларнинг устунлигини йирик ҳисобга етказди.

Сешанба куни, 10 мартда Венсан Компани шогирдлари Чемпионлар лигаси доирасида «Аталанта»га қарши майдонга тушади.