«Брентфорд»нинг қанот ҳужумчиси Кевин Шаде мавсум якунланганидан сўнг жамоасини ўзгартириши мумкин. Бу ҳақда TEAMtalk нашри хабар бермоқда.

Манбанинг таъкидлашича, айни дамда 24 ёшли германиялик футболчи учун «Тоттенхэм», «Бавария» ва «Интер» клублари кураш олиб бормоқда. Шаденинг ўзи фаолиятида юқорироқ даражага чиқишни жуда истамоқда, «Брентфорд» эса агар манфаатли таклиф тушса, уни сотишга қарши эмас. «Арилар» вингер трансферидан салмоқли фойда кўришлари мумкин деб ҳисоблашмоқда.

2023 йилнинг ёзида «Брентфорд» Шадени «Фрайбург»дан 25 миллион евро эвазига сотиб олган эди. Жорий мавсумда ҳужумчи барча турнирларда 29 та ўйинда майдонга тушиб, 7 та гол урди ва 3 та голли узатма муаллифига айланди.

Transfermarkt маълумотларига кўра, Шаденинг бозор қиймати 35 миллион еврони ташкил этади.