«Brentford»ning qanot hujumchisi Kevin Shade mavsum yakunlanganidan so‘ng jamoasini o‘zgartirishi mumkin. Bu haqda TEAMtalk nashri xabar bermoqda.

Manbaning ta’kidlashicha, ayni damda 24 yoshli germaniyalik futbolchi uchun «Tottenxem», «Bavariya» va «Inter» klublari kurash olib bormoqda. Shadening o‘zi faoliyatida yuqoriroq darajaga chiqishni juda istamoqda, «Brentford» esa agar manfaatli taklif tushsa, uni sotishga qarshi emas. «Arilar» vinger transferidan salmoqli foyda ko‘rishlari mumkin deb hisoblashmoqda.

2023 yilning yozida «Brentford» Shadeni «Frayburg»dan 25 million yevro evaziga sotib olgan edi. Joriy mavsumda hujumchi barcha turnirlarda 29 ta o‘yinda maydonga tushib, 7 ta gol urdi va 3 ta golli uzatma muallifiga aylandi.

Transfermarkt ma’lumotlariga ko‘ra, Shadening bozor qiymati 35 million yevroni tashkil etadi.