«Ливерпуль» шанба куни ярим ҳимоячи Райан Гравенберх билан шартнома узайтирилганини эълон қилди. Мерсисайдликлар футболчилар билан имзоланган шартнома муддатларини очиқламайдилар — Гравенберх билан боғлиқ вазият ҳам бу қоидадан истисно бўлмади.
Британия ОАВ маълумотларига кўра, Райан Гравенберхнинг «Ливерпуль» билан янги меҳнат шартномаси 2028 йилнинг ўрталарига қадар мўлжалланган.
Гравенберх «Ливерпуль» сафида барча турнирларда жами 123 та ўйин ўтказди. Уларда нидерландиялик футболчи саккиз бор рақиблар дарвозасини ишғол қилди ва 12 марта шерикларига голли узатма берди.
«Ливерпуль» жума куни сафарда «Вулверхэмптон»ни 3:1 ҳисобида мағлуб этди ва Англия Кубогининг чорак финалига йўл олди.
