Дортмунднинг «Боруссия» клуби ярим ҳимоячиси Юлиан Брандт фаолиятини Англия Премьер-лигасида давом эттириши мумкин. Аввалроқ «асаларилар» раҳбарияти 29 ёшли футболчи ёзда эркин агент сифатида жамоани тарк этишини маълум қилган эди. Томонлар янги шартнома шартлари бўйича келишувга эриша олишмаган.
BBC берган маълумотларга кўра, Брандтнинг трансферига «Астон Вилла» қизиқиш билдирмоқда. Инглиз клуби яқин вақт ичида германиялик футболчига расмий таклиф билан чиқишни режалаштирмоқда.
Юлиан Брандт 2019 йилда «Байер»дан «Боруссия» Дортмундга 25 миллион евро эвазига ўтган эди. Жорий мавсумда ярим ҳимоячи барча мусобақаларда 32 та ўйинда майдонга тушиб, 10 та гол урди ва учта голли узатмани амалга оширди.
