Илгари Мадриднинг «Реал» клубида отаси Карлонинг ёрдамчиси бўлиб ишлаган Давиде Анчелотти Винисиус Жуниор ҳақида ўз фикрларини билдирди.

36 ёшли мураббий бразилиялик футболчининг ўйинидан ҳайратда эканини ва унга нисбатан қилинаётган танқидларни қўллаб-қувватламаслигини маълум қилди.

«Винисиусга нима керак? Ҳеч нарса. Вини — энг зўри. У голлар уради, алдамчи ҳаракатларни амалга оширади, голли узатмалар беради. Унга нисбатан ҳеч қандай эътироз бўлиши мумкин эмас. Кўпчилик унинг ўзини тутиши ҳақида гапиради, лекин бу унинг майдондаги муваффақиятларидан чалғитмаслиги керак. Вини бир ўзи ўйин суръатини ўзгартириб юборишга қодир, шу сабабли рақиблар «Реал» билан ўйинга тайёргарлик кўраётганда, айнан унга мослаб ўз режаларига тузатиш киритадилар. Унинг қанчалик ажойиб футболчи эканини унутиш керак эмас», — деди кичик Анчелотти DAZN нашрига берган интервьюсида.

Бугун «Реал» Чемпионлар лигаси доирасида «Манчестер Сити»га қарши майдонга тушади.