Мадриднинг «Атлетико» клуби ҳужумчиси Хулиан Альваресга «Барселона»га эҳтимолий ўтиши ҳақида навбатдаги савол берилди.
Аргентиналик футболчини Каталония клуби билан боғлаш тўхтамаяпти. «Матрасчилар» форварди «кўк-анорранглилар»нинг асосий трансфер мақсадларидан бири ҳисобланади.
«Мен «Атлетико»да бахтлиман ва «Барселона»га ўтиш ҳақида ҳеч қачон ҳеч нарса демаганман. Бу шов-шувлар туфайли ҳамма нарса чигаллашиб кетди (тартибсизликка айланди), лекин ҳозирги клубимда ҳаммаси жойида.
Кейинги мавсумда «Атлетико»да ўйнайманми? Балки ҳа, балки йўқ, лекин ҳозир бу ерда бахтлиман», — дея 26 ёшли футболчининг сўзларини келтиради The Touchline.
Сешанба куни Альварес Чемпионлар лигаси доирасида «Тоттенхэм»га қарши кечган ўйин (5:2) қаҳрамонларидан бирига айланди — у ўз ҳисобига иккита гол ва битта голли узатмани ёздириб қўйди.
