Германиянинг "Бавария" клуби ярим ҳимоячиси Александр Павлович "Аталанта"га қарши кечган баҳс якунида ўз фикрлари билан ўртоқлашди. Чемпионлар Лигаси 1/8 финали доирасидаги илк учрашув мюнхенликларнинг сафардаги 6:1 ҳисобидаги ишончли ғалабаси билан якунланди.

"Бундан анча яхшироқ ўйнашнинг деярли иложи йўқ эди. Идеал ҳолатда гол ўтказиб юбормасликни истардик, аммо бу — ажойиб натижа ва ажойиб ўйин. Ҳам ҳужумда, ҳам ҳимояда деярли барча ишни юқори даражада бажардик. Менимча, шу сабабли ҳисоб шунчалик ишончли кўриниш олди", — дея Павловичнинг сўзларини келтиради УЕФА сайти.