«Аталанта» раҳбарияти жамоа бош мураббийи Раффаэле Палладино билан амалдаги шартномани узайтириш ниятида.
TuttoMercatoWEB нашрининг хабар беришича, Чемпионлар лигаси 1/8 финалининг илк баҳсида Мюнхеннинг «Бавария» клубидан учралган йирик (1:6) мағлубиятга қарамай, Бергамо клуби мураббий билан янги битимни муҳокама қилишни режалаштирмоқда. Янги шартнома 2029 йилнинг ёзига қадар мўлжалланиши кутилмоқда. «Аталанта» мутасаддилари Палладинони клуб лойиҳасини ривожлантириш учун энг муносиб номзод деб ҳисобламоқдалар.
Раффаэле Палладинонинг «Аталанта» билан ҳозирги шартномаси 2026/27 йилги мавсум якунигача амал қилади. У жамоани 2025 йилнинг ноябрь ойида Иван Юрич истеъфосидан сўнг қабул қилиб олган эди. Февраль ойи якунларига кўра, Палладино «Кремонезе», «Лацио» ва «Наполи» устидан қозонилган ғалабалардан сўнг А Серияда ойнинг энг яхши мураббийи деб топилган эди.
