Уругвайлик ярим ҳимоячи Федерико Вальверде «Реал»нинг «Манчестер Сити»га қарши ўйинида (3:0) бош қаҳрамонга айланди. Феде учта гол уриб, Альваро Арбелоанинг мураббийлик нуфузини ошириш билан бирга, жамоасининг Чемпионлар лигаси чорак финалига чиқиш имкониятини кескин кучайтирди.
Маълум бўлишича, Вальверде охирги 60 йил ичида Чемпионлар лигасида хет-трик қайд этган «Реал»нинг илк ярим ҳимоячисига айланди. Унгача бу натижани фақат бир футболчи — Хосе Мартинес Санчес, кўпчиликка Пирри номи билан машҳур афсона уддалаган эди. Пирри ўшанда Кипрнинг «АEЛ Лимассол» жамоасига қарши ўйинда учта гол урган.
Қизиқарли жиҳати шундаки, ҳозирда ҳаёт бўлган Пирри «Манчестер Сити» билан баҳс пайтида стадионда клубнинг фахрий президенти сифатида бевосита иштирок этди ва ўз рекорди такрорланганига гувоҳ бўлди.
