Лондоннинг "Тоттенхэм" клуби ҳужумчиси Доминик Соланке расман АПЛда февраль ойининг энг чиройли голи муаллифи деб топилди. Бу ҳақда Премьер-лига матбуот хизмати хабар бермоқда.

Доминик ўзининг машҳур голини "Ман Сити"га қарши ўйинда киритди ва бу зарба камдан-кам учрайдиган ноёб ижро бўлди. Ўнг қанотдан жамоадоши томонидан етказиб берилган узатмани Соланке одатий зарба билан эмас, балки "чаён зарбаси" услубида дарвозага йўллади. Рақиб посбони Доннарумма дарвоза тўридан жой олган тўпни фақат нигоҳлари билан кузатиб қолишга мажбур бўлди.

Бироқ, ушбу гол "шпорлар"га ғалаба келтирмади: ўша баҳсда 2:2 ҳисоби қайд этилди. "Тоттенхэм"нинг умумий ҳолатига тўхталадиган бўлсак, ҳозирда жамоа АПЛни тарк этишга номзодлардан бири бўлиб турибди. Клуб турнир жадвалида 16-ўринни эгаллаб турибди ва хавфли ҳудуддаги 18-ўриндан бор-йўғи бир очко олдинда, холос.