«Бавария» Бундеслиганинг 26-туридан ўрин олган «Байер»га қарши ўйинда (1:1) Луис Диаснинг майдондан четлатилиши юзасидан шикоят қилди.
Вингер учрашувнинг 84-дақиқасида рақиб жарима майдончасида симуляция ишлатгани учун иккинчи сариқ карточкани олди — колумбиялик футболчи пенальти ишлаш мақсадида дарвозабон билан контактни бўрттириб кўрсатган эди. Диас биринчи карточкани хавфли ўйин учун, яъни Алеиш Гарсиянинг бошига бутсасининг тишлари билан теккизиб юборгани учун олганди. Шу тариқа, «Бавария» ўйинни 9 киши бўлиб якунлади — биринчи бўлимда ҳакам Кристиан Дингерт Николас Жексонни ҳам майдондан четлатган эди.
Кейинчалик Дингерт Диасни четлатишда хатога йўл қўйганини тан олди.
Журналист Керри Хаунинг хабар беришича, бугун «Бавария» Диаснинг четлатилиши юзасидан Германия Спортив судига апелляция топширган.
