Англия футболида 30-тур ўйинлари бўлиб ўтмоқда. «Ливерпуль» ўз майдонида Лондоннинг «Тоттенхэм» жамоаси билан баҳсда ғалабали ҳисобни сақлаб қола олмади — 1:1. «Ливерпуль»нинг собиқ футболчиси Жейми Реднапп «шпорлар»нинг муваффақиятига (у қўлга киритилган бир очкони айнан шундай баҳолади) изоҳ берди.

«Кетма-кет бешта мағлубиятдан сўнг бу ажойиб натижа. Бу ерда, Ливерпулда ҳеч ким уларга заррача ишонмаган эди. Мен ўзим ҳам бунга умуман ишонмагандим. Агар улар мағлуб бўлишганида, Игор Тудорга жавоб бериб юборишган бўларди», — дея Реднаппнинг сўзларини келтиради BBC Sport.

Бу «Тоттенхэм» учун Игор Тудор бошқарувидаги илк мағлубиятсиз ўйин бўлди. Шунга қарамай, жамоа турнир жадвалида ҳамон 16-ўринда қолмоқда.