Миланнинг «Интер» клуби ўнг қанот ҳимоячиси Дензел Дюмфрисни жамоада олиб қолиш ниятида.
29 ёшли нидерландиялик футболчининг амалдаги меҳнат шартномаси 2028 йилнинг ўрталарида якунига етади, бироқ «нерадзурри» раҳбарияти келишувни яна бир йилга узайтиришни режалаштирмоқда, деб хабар беради Tuttomercatoweb. Келишув имзоланган тақдирда, футболчининг йиллик маоши 4 миллион евродан 5 миллион еврогача кўтарилади.
Дензел Дюмфрис 2021 йилнинг августидан буён «Интер» шарафини ҳимоя қилиб келмоқда. Жорий мавсумда латераль Милан грандининг барча мусобақалардаги 19 та ўйинида иштирок этиб, ўз ҳисобига учта голли узатмани ёздириб қўйди. Апрель ойида футболчи 30 ёшга тўлади, яқиндагина у жароҳатидан фориғ бўлиб майдонга қайтди.
