«Манчестер Сити» ҳужумчиси Эрлинг Холанд яқин келажакда клубини ўзгартириши мумкин.
El Nacional нашрига таяниб Transfer News Live хабар беришича, норвегиялик футболчи 2027 йилнинг ёзида жамоадан кетиш нияти борлиги ҳақида «шаҳарликлар» раҳбариятини аллақачон огоҳлантирган. Шу билан бирга, манбанинг таъкидлашича, форвард келаётган ёзда жамоани аниқ тарк этмайди — у Англияда яна бир мавсум қолади.
Эрлинг Холанд учун асосий даъвогар сифатида Мадриднинг «Реал» клуби тилга олинмоқда, шунингдек, миш-мишларга кўра, «Барселона» ҳам юлдуз футболчини қўлга киритишни орзу қилмоқда. Transfermarkt портали экспертлари 25 ёшли футболчининг қийматини 200 миллион еврога баҳоламоқда, унинг «Манчестер Сити» билан шартномаси 2034 йилгача мўлжалланган.
