«Бавария» Чемпионлар лигаси 1/8 финали доирасидаги «Аталанта»га қарши жавоб учрашувига 16 ёшли дарвозабон билан чиқиши мумкин.
Мюнхенликларнинг асосий дарвозабони ва сардори Мануэль Нойер болдир мушаги йиртилишидан кейин тикланиш жараёнини ўтамоқда, Йонас Урбиг эса «Аталанта» билан бўлган илк ўйинда (6:1) бош мия чайқалиши жароҳатини олди. Бундан ташқари, Свен Ульрайх Германия чемпионати доирасидаги «Байер»га қарши баҳсда (1:1) сон мушагини шикастлаб олган.
AP нашри хабар беришича, агар уларнинг ҳеч бири 18 мартга қадар соғайишга улгурмаса, асосий таркибда сўнгги икки ўйинда захирадан жой олган 16 ёшли Леонард Прескотт пайдо бўлиши мумкин. Прескотт Нью-Йоркда туғилган ва фаолиятини «Унион»да бошлаган, «Бавария» академиясига эса 2023 йилда ўтган.
Яна бир вариант сифатида 19 ёшли Яннис Бартль кўрилмоқда. У Леон Кланацнинг жароҳатидан сўнг мюнхенликларнинг захира жамоасида тўп сурмоқда. Бартль жорий мавсумда Бундеслига доирасида икки бор асосий жамоа қайдномасига киритилган.













