«Милан» спорт директори Игли Таре Лука Модричнинг шартномаси билан боғлиқ вазиятга изоҳ берди.
40 ёшли футболчининг амалдаги келишуви жорий мавсум якунида ниҳоясига етади, бироқ хорватиялик футболчининг хоҳишига кўра, шартнома автоматик тарзда яна бир йилга узайтирилиши мумкин.
«Биз Модрични яхши кўрамиз, Модрич эса «Милан»ни яхши кўради. Биз уни жамоада олиб қолишга ва шартномани яна бир йилга узайтиришга тайёрмиз. Биз учун бу оддий қарор, аммо ҳаммаси унинг истагига боғлиқ», — деди Таре.
Лука Модрич ўтган йилнинг ёзида Мадриднинг «Реал» клубидан эркин агент сифатида «россонерилар» сафига келиб қўшилган эди. Италияга кўчиб ўтгунга қадар ярим ҳимоячи 13 йил давомида «қаймоқранглилар» шарафини ҳимоя қилган.
