«Комо» бош мураббийи Франсеск Фабрегас А Сериянинг 29-тури доирасида «Рома» устидан қозонилган ғалабадан (2:1) сўнг матбуот анжуманида иштирок этди.

15 март куни бўлиб ўтган учрашувда Фабрегас жамоаси ўйин давомида ҳисобда ортда бораётиб, характер ва вазминлик кўрсата олганини таъкидлади.

«Мен доимо ечим топа оладиган жамоани кўрдим. Пенальтидан сўнг ўзини йўқотиб қўйиш жуда осон, бироқ йигитлар [ғалабага] жуда чанқоқ эдилар», — дея испаниялик мутахассиснинг сўзларини келтирмоқда TMW.

Ярим ҳимоячи Да Кунья алоҳида мақтовга лойиқ кўрилди.

«Да Куньянинг ажойиб ўйин ўтказгани янгилик эмас. У биз учун фундаментал аҳамиятга эга футболчи. Унинг ўсиш салоҳияти жуда юқори. У руҳият жиҳатдан ҳақиқий сардор», — деди мураббий.

Ҳозирда «Комо» 54 очко билан турнир жадвалида тўртинчи ўринни эгаллаб турибди.