«Реал» ҳимоячиси Антонио Рюдигер ўз келажаги мавзусида тўхталиб ўтди. Германиялик футболчининг амалдаги шартномаси шу ёзда ўз ниҳоясига етади.
«Мен учун энг муҳими — соғлом бўлиш. Ўзимни яхши ҳис қиляпман. Қолган масалаларга келсак... Ишончим комилки, биз ўзаро келишувга эришамиз. Ҳозир бу ҳақда гапирадиган вақт эмас.
Бу ерда ўзимни жуда яхши ҳис қиляпман. Одамларнинг менга бўлган ҳурматини сезяпман ва буни юқори баҳолайман. Баъзида фақат ҳиссиётларга берилмаслик керак, бу бизнинг ишимиз эканини ҳам ҳисобга олиш лозим. Аммо менга «Реал»да ўйнаш жуда ёқади», — деди Рюдигер матбуот анжуманида.
Эслатиб ўтамиз, баҳор бошида Антонио Рюдигер 33 ёшни қарши олди. Германиялик ҳимоячи 2022 йилнинг ёзида «Челси»дан трансфер қилинганидан буён «қаймоқранглилар» шарафини ҳимоя қилиб келмоқда.
