Лондоннинг «Фулхэм» клуби ва Эйндховеннинг ПСВ жамоаси ҳужумчи Рикардо Пепининг ёзги трансфери борасида келишувга эришишди. Инсайдер Фабрицио Романонинг хабар беришича, клублар ўртасида футболчи бўйича оғзаки келишув мавжуд. «Дала ҳовли эгалари» ушбу трансфер учун 36 миллион евро тўлашади.
Пепи 23 ёшда. Америкалик футболчи бундан уч йил аввал «Аугсбург»дан ўтганидан сўнг ПСВ ўйинчисига айланган эди. У Техаснинг «Даллас» клуби академияси тарбияланувчиси ҳисобланади.
Жорий мавсумда ҳужумчи ПСВ сафида 27 та расмий ўйинда майдонга тушиб, 13 та гол муаллифига айланди. Transfermarkt портали Пепини 25 миллион еврога баҳоламоқда.
