«Манчестер Сити» клуби X ижтимоий тармоғидаги саҳифасида АПЛ томонидан эълон қилинган «Манчестер Юнайтед» ярим ҳимоячиси Бруну Фернандешнинг статистикасига муносабат билдирди.

Ушбу постда португалиялик футболчи манкунианликлар сафида 319 та ўйинда 100 та голли узатмани амалга оширгани алоҳида қайд этилган эди. Шунингдек, унда «Барселона»нинг собиқ аъзоси Лионель Месси (338 та ўйинда 100 та ассист) ва «Реал Мадрид» собиқ ҳужумчиси Криштиану Роналдунинг (341 та ўйинда 100 та ассист) кўрсаткичлари ҳам келтирилган.

«Шаҳарликлар» бунга жавобан жамоанинг собиқ ярим ҳимоячиси Кевин Де Брёйненинг натижаларини эълон қилишди. Бельгиялик футболчи «Манчестер Сити» сафида 244 та учрашувдаёқ 100 та голли узатма маррасига етган эди. Клуб ушбу постга тож эмодзисини илова қилган.