«Манчестер Сити»нинг юлдуз ҳужумчиси Эрлинг Холанд шахматга сармоя киритишни бошлаганини эълон қилди. У Norway Chess (2013 йилдан буён Ставангер шаҳрида ўтказиб келинаётган халқаро шахмат турнири) ҳамда жаҳон чемпионатининг янги формати — Total World Chess Championship лойиҳасига маблағ йўналтиради.

Норвегиялик бизнесмен Мартен Борге билан биргаликда футболчи Chess Mates компаниясига асос солди. Ушбу компания Норвегия шахмат ассоциациясининг йирик акциядорларидан бирига айланади.

«Шахмат — ажойиб ўйин. У тафаккурни чархлайди ва футбол билан ўхшаш жиҳатлари ҳам бор. Тез қарор қабул қилиш, интуицияга ишониш ва бир неча юришни олдиндан ўйлаб чиқиш керак.

Мен Norway Chess’га сармоя киритяпман, чунки ишонаманки, Total Chess World Championship Tour янги тури шахматни бутун дунё томошабинлари учун янада оммалаштириши мумкин. Norway Chess жамоаси аллақачон мусобақани ривожлантиришда катта ишларни амалга оширган, ва бу лойиҳага қўшилиш имкониятини қўлдан чиқариш мумкин эмас эди», — дея Холанд сўзларини келтиради ФИДЕ.

Total Chess World Championship Tour йил давомида турли шаҳарларда ўтказиладиган тўртта турнирдан иборат бўлади. Унинг якунларига кўра, бир вақтнинг ўзида учта йўналиш — классик шахмат, рапид ва блиц бўйича ягона жаҳон чемпиони аниқланади. Ушбу мусобақалар ФИДЕ томонидан камида 16 йилга маъқулланган.

Маълум қилинишича, турнирнинг умумий мукофот жамғармаси камида 2,7 миллион АҚШ долларини ташкил этади. Лойиҳанинг илк синов турнири 2026 йил кузида ўтказилади, 2027 йилдан эса тўлиқ мавсум йўлга қўйилади.