«Manchester Siti»ning yulduz hujumchisi Erling Xoland shaxmatga sarmoya kiritishni boshlaganini e’lon qildi. U Norway Chess (2013 yildan buyon Stavanger shahrida o‘tkazib kelinayotgan xalqaro shaxmat turniri) hamda jahon chempionatining yangi formati — Total World Chess Championship loyihasiga mablag‘ yo‘naltiradi.

Norvegiyalik biznesmen Marten Borge bilan birgalikda futbolchi Chess Mates kompaniyasiga asos soldi. Ushbu kompaniya Norvegiya shaxmat assosiasiyasining yirik aksiyadorlaridan biriga aylanadi.

«Shaxmat — ajoyib o‘yin. U tafakkurni charxlaydi va futbol bilan o‘xshash jihatlari ham bor. Tez qaror qabul qilish, intuisiyaga ishonish va bir necha yurishni oldindan o‘ylab chiqish kerak.

Men Norway Chess’ga sarmoya kirityapman, chunki ishonamanki, Total Chess World Championship Tour yangi turi shaxmatni butun dunyo tomoshabinlari uchun yanada ommalashtirishi mumkin. Norway Chess jamoasi allaqachon musobaqani rivojlantirishda katta ishlarni amalga oshirgan, va bu loyihaga qo‘shilish imkoniyatini qo‘ldan chiqarish mumkin emas edi», — deya Xoland so‘zlarini keltiradi FIDE.

Total Chess World Championship Tour yil davomida turli shaharlarda o‘tkaziladigan to‘rtta turnirdan iborat bo‘ladi. Uning yakunlariga ko‘ra, bir vaqtning o‘zida uchta yo‘nalish — klassik shaxmat, rapid va blis bo‘yicha yagona jahon chempioni aniqlanadi. Ushbu musobaqalar FIDE tomonidan kamida 16 yilga ma’qullangan.

Ma’lum qilinishicha, turnirning umumiy mukofot jamg‘armasi kamida 2,7 million AQSH dollarini tashkil etadi. Loyihaning ilk sinov turniri 2026 yil kuzida o‘tkaziladi, 2027 yildan esa to‘liq mavsum yo‘lga qo‘yiladi.