«Манчестер Юнайтед» ярим ҳимоячиси Бруну Фернандеш Англия премьер-лигасидаги самарали ҳаракатлари бўйича «Челси»нинг собиқ юлдузи Эден Азарни ортда қолдирди.
«Қизил иблислар» сардори жума куни «Борнмут»га қарши кечган баҳсда пенальтини аниқ амалга оширди. The Touchline нашрининг хабар беришича, энди Фернандеш ҳисобида Англия чемпионатидаги 137 та голли ҳаракат мавжуд — бу Азарникидан биттага кўп демакдир. Шу билан бирга, португалиялик футболчи бельгилияликка қараганда 22 та кам ўйин ўтказган.
Эден Азар 2012 йилдан 2019 йилгача «Челси» шарафини ҳимоя қилган. Бруну Фернандеш эса 2020 йил бошидан буён «Манчестер Юнайтед»да ўйнамоқда. Яқинда хавбек АПЛнинг битта мавсумида голли узатмалар бериш бўйича манкунианликларнинг клуб рекордини ўрнатди — 16 та ассист.
