Англия Чемпионшипи вакили «Миллуолл» клуби «Ден» стадиони бўйича янги ижара шартномасини имзолади. Ушбу келишув 999 йилга мўлжалланган.
«Ушбу тарихий келишув узоқ муддатли барқарорликни таъминлайди, клубнинг тарихий уй стадионини ҳимоя қилади ҳамда улкан ва барқарор ўсиш учун асос яратади», — деб ёзади лондонликлар.
Ҳозирда «Миллуолл» клуби 141 ёшда. Ўтган мавсумда Лондон клуби Чемпионшипдаги 24 та жамоа ичида саккизинчи ўринни эгаллаган эди.
2004 йилда «Миллуолл» Англия Кубоги финалига қадар етиб борган ва Кардиффдаги «Миллениум» стадионида кечган ҳал қилувчи баҳсда «Манчестер Юнайтед»га 0:3 ҳисобида имкониятни бой берганди. Ўша ўйинда Криштиану Роналду ва Рууд ван Нистелрой (дубль) гол муаллифи бўлишган.
«Ден» стадиони 1993 йилда очилган бўлиб, ўз бағрига 20 146 томошабинни сиғдира олади.
