Angliya Chempionshipi vakili «Milluoll» klubi «Den» stadioni bo‘yicha yangi ijara shartnomasini imzoladi. Ushbu kelishuv 999 yilga mo‘ljallangan.

«Ushbu tarixiy kelishuv uzoq muddatli barqarorlikni ta’minlaydi, klubning tarixiy uy stadionini himoya qiladi hamda ulkan va barqaror o‘sish uchun asos yaratadi», — deb yozadi londonliklar.

Hozirda «Milluoll» klubi 141 yoshda. O‘tgan mavsumda London klubi Chempionshipdagi 24 ta jamoa ichida sakkizinchi o‘rinni egallagan edi.

2004 yilda «Milluoll» Angliya Kubogi finaliga qadar yetib borgan va Kardiffdagi «Millenium» stadionida kechgan hal qiluvchi bahsda «Manchester Yunayted»ga 0:3 hisobida imkoniyatni boy bergandi. O‘sha o‘yinda Krishtianu Ronaldu va Ruud van Nistelroy (dubl) gol muallifi bo‘lishgan.

«Den» stadioni 1993 yilda ochilgan bo‘lib, o‘z bag‘riga 20 146 tomoshabinni sig‘dira oladi.