«Манчестер Сити» бош мураббийи Хосеп Гвардиола Микель Артетанинг «Арсенал»даги муваффақиятлари ҳақида нима деб ўйлашини сўзлаб берди.

Бугун жамоалар Англия Лига Кубоги финалида тўқнаш келишади. «Уэмбли» стадионидаги учрашувнинг бошланиш ҳуштаги Тошкент вақти билан соат 21:30 да янграйди.

«Мураббий учун футболчиларнинг эмас, балки раҳбариятнинг қўллаб-қувватлаши муҳимроқ. Футболчилар ғалаба қозонаётганингизда сизни қўллайдилар, акс ҳолда — ҳаммаси тескари бўлади. Айнан клуб раҳбарияти шундай дастак бериши керакки, уни ўйинчилар ҳам ҳис қилишсин. Менимча, «Арсенал»да айнан шу нарса содир бўлди — муваффақиятнинг сабаби ҳам шунда. Қаранг, бошқа клублар мураббийларни нақадар тез алмаштиришмоқда. Артетада қўллаб-қувватлаш бор, у Англия Кубоги ва Суперкубогини ютди, «Арсенал»да ишлаётганига олти йилдан ошди. Буларнинг барчаси раҳбариятнинг унга бўлган ишончи туфайлидир», – дея таъкидлади Гвардиола матбуот анжуманида.