«Manchester Siti» bosh murabbiyi Xosep Gvardiola Mikel Artetaning «Arsenal»dagi muvaffaqiyatlari haqida nima deb o‘ylashini so‘zlab berdi.
Bugun jamoalar Angliya Liga Kubogi finalida to‘qnash kelishadi. «Uembli» stadionidagi uchrashuvning boshlanish hushtagi Toshkent vaqti bilan soat 21:30 da yangraydi.
«Murabbiy uchun futbolchilarning emas, balki rahbariyatning qo‘llab-quvvatlashi muhimroq. Futbolchilar g‘alaba qozonayotganingizda sizni qo‘llaydilar, aks holda — hammasi teskari bo‘ladi. Aynan klub rahbariyati shunday dastak berishi kerakki, uni o‘yinchilar ham his qilishsin. Menimcha, «Arsenal»da aynan shu narsa sodir bo‘ldi — muvaffaqiyatning sababi ham shunda. Qarang, boshqa klublar murabbiylarni naqadar tez almashtirishmoqda. Artetada qo‘llab-quvvatlash bor, u Angliya Kubogi va Superkubogini yutdi, «Arsenal»da ishlayotganiga olti yildan oshdi. Bularning barchasi rahbariyatning unga bo‘lgan ishonchi tufaylidir», – deya ta’kidladi Gvardiola matbuot anjumanida.
